Yasamal rayonunda yerləşən İran klinikasının bir neçə gündür fəaliyyətini dayandırdığı haqda məlumatlar yayılıb. 

Klinikanın hansı səbəbdən bağlandığı haqda isə məlumat yoxdur.

Məsələni dəqiqləşdirmək üçün İran klinikasının USM Həkimi Lalə Sultanova ilə əlaqə yaratdıq. O, klinikanın bağlandığını təsdiqləsə də, səbəbi barədə məlumat verməyib. 

İranın Azərbaycandakı səfirliyinin mətbuat müşaviri Behnam Məlikpur isə ümumiyyətlə sözügedən məlumatdan xəbərsiz olduqlarını bildirib. 

Məsələ ilə bağlı Səhiyyə Nazirliyindən açıqlama gəlib. Nazirliyin İctimaiyyətlə əlaqələr sektorunun müdiri Elvin Hacıyevin sözlərinə görə qeyd edilən klinikada plandankənar yoxlamalar aparılıb və nöqsanlar aşkarlanıb:

“Həmin nöqsanların aradan qaldırılması məqsədi ilə qanuna müvafiq olaraq klinikaya müddət verilib. Növbəti yoxlamalar zamanı aşkarlanan nöqsanların müəyyən edilmiş müddət ərzində aradan qaldırılmadığı məlum olub. Bunları nəzərə alaraq müvafiq materiallar aidiyyatı üzrə lisenziya verən dövlət qurumuna təqdim edilib". 

Qeyd edək ki, "İran klinikası" İran İslam Respublikasının Qızıl Aypara Cəmiyyətinin tibb müəssisəsidir və Bakıda uzun illərdir fəaliyyət göstərir. 

Məsələ ilə bağlı Qızıl Aypara Cəmiyyəti ilə əlaqə yaratmaq cəhdimiz baş tutmayıb.