İnanırıq ki, bu gün Azərbaycanla Yeni Kaledoniya arasında imzalanan əməkdaşlıq memorandumu sayəsində Fransa yürütdüyü siyasətdən çəkinəcək və bizim faydamıza olan addımlar atacaq.

Bu fikirləri Yeni Kaledoniya senatının üzvü Moris Vimian aprelin 18-də Milli Məclisdə keçirilən mətbuat konfransında səsləndirib.

“Fransa ilə Yeni Kaledoniya arasında kanak xalqının mənsubiyyətini qorumaq üçün müxtəlif sənədlər imzalanıb. Artıq 20-30 ildir ki, bu sənədlər var, amma onlar tətbiq edilmir. Ona görə də biz kanak xalqının mənsubiyyətini tam olaraq qoruyub saxlaya bilmirik”, - deyə Moris Vimian qeyd edib.