Rusiyaya qarşı tətbiq olunması gözlənilən 10-cu sanksiyalar paketinin detalları açıqlanıb.

Demokratikmusavat.com xəbər verir ki, bu barədə "Politico" nəşri Brüsseldəki diplomatik mənbələrə istinadən yazıb.

Nəşrin məlumatına görə, Aİ-nin yeni sanksiyalar paketinə dörd Rusiya bankı, həmçinin milyarder Mixail Fridman tərəfindən təsis edilən ölkənin ən böyük özəl bankı “Alfa-Bank” daxildir.

"Politico"nun məlumatına görə, yeni sanksiyalar siyahısına Polşa, Baltikyanı ölkələr, Almaniya, Fransa və digər ölkələr tərəfindən təklif edilən 130-a yaxın qurum və şəxsin adı daxil ediləcək ki, bunlara Rusiya hərbi rəhbərləri, Rusiya tərəfindən Ukraynada işğal olunmuş ərazilərə təyin edilmiş məmurlar, Rusiyanın dövlət mediası və “Russia Today” üçün çalışan jurnalistlər, habelə Rusiyanın müharibə səyləri və ya "Vaqner" muzdlu qruplaşması ilə əlaqəsi olan digər ölkələrdəki şirkətlər və şəxslər daxildir.

Yeni paketdə Aİ-də elektrik şəbəkələri və ya qaz provayderləri kimi mühüm infrastruktur şirkətlərinin idarə heyətində xidmət edən Rusiya vətəndaşlarına da məhdudiyyətlər tətbiq olunması gözlənilir:

“Rusiya istehsalı asfaltın və ya bitumunun (neft məhsulu) Aİ-yə idxalına və Aİ mallarının Rusiyaya ixracına əlavə ticarət qadağaları, o cümlədən yük maşınları, digər ağır nəqliyyat vasitələri, tikinti maşınları, nasoslar və tikinti sektorunda istifadə olunan digər maşınların idxalına qadağanın tətbiqi planlaşdırılır. Paket həmçinin Rusiyanın silah istehsalında istifadə edə biləcəyi elektron komponentlərə əlavə ixrac qadağalarını da əhatə edir. Səlahiyyətlilər almazların paketə daxil olub-olmayacağının aydın olmadığını bildirib”.

Brüssel həmçinin Rusiyaya neft ixracına dair sanksiyalardan yayınmağa kömək etməkdə şübhəli bilinən Dubayda yerləşən gəmiçilik şirkətini siyahıya salmağı planlaşdırır.

Şirkətin Rusiyaya məxsus şirkətlərə Aİ və beynəlxalq sanksiyalar səbəbindən artıq neft daşımağa icazə verilməyən bir neçə Rusiya neft tankeri aldığı güman edilir.