Baş nazirin keçmiş müavini Əli Həsənovun nəvəsi Nail Allahverdiyevin törətdiyi yol qəzasında yaralananlardan biri – Türkiyə vətəndaşı Songül Tekiş yenidən məhkəməyə müraciət edib.
Demokratikmusavat.com “Azadliq.org”-a istinadla xəbər verir ki, S.Tekiş Azərbaycanda N.Allahverdiyevin atası Elman Allahverdiyevlə onun rəhbərlik etdiyi “Gardenia” MMC-yə qarşı məhkəmə iddiası qaldıraraq, qarşı tərəfdən 76 min 850 avro tələb edir. Bu məbləğ əmək qabiliyyətinin 80 faizini itirərək I qrup əlil olmuş zərərçəkənə yeni sensorlu gəzdirmə cihazı alınması üçün lazımdır. Onun sözlərinə görə, aparatın alınmasından ötrü Allahverdiyevin ailəsinə xəbər göndərsə də, nəticəsi olmayıb. 2017-ci il avqustun 3-də baş vermiş qəzada S.Tekişlə yanaşı, yanında olan həyat yoldaşı Mutallib Tekiş də ağır xəsarət alıb. O vaxt cütlük səkidə gedərkən idarəetməni itirən avtomobil yoldan çıxaraq, onları vurub.
Allahverdiyevlər ailəsi Tekiş cütlüyü ilə 2017-ci ildə müqavilə bağlayaraq, çəkilən tibbi xərclərə və mənəvi ziyana görə S. Tekişə 265 min dollar ödəmək, eləcə də daha sonra yaranacaq bütün müalicə və qulluq xidmətlərini qarşılamaq öhdəliyi götürüb. Vəd olunan vəsait ödənilib. S.Tekiş müqavilədəki “daha sonra da yaranacaq bütün müalicə və qulluq xidmətlərini qarşılamaq öhdəliyi”nə əsaslanaraq, məhkəmədə iddia qaldırıb: “Mən və ərim o qəzada əlil olmuşuq, 3 övladımızla başqalarının köməyinə möhtac qalmışıq. Omürlük əlil olaraq yaşamağa məhkumuq. Bu şəkildə yaşamaq həm mənə, həm də ailə üzvlərimə əzabdır. Amma ölə də bilmirəm, axı hüquqa zidd olduğu təlqin edilir”.
Qarşı tərəf onun iddiasına etiraz edir. E.Allahverdiyevin nümayəndəsi bildirib ki, Tekiş ailəsinə münasibətdə öhdəliklər tam yerinə yetirilib. Onlar da 2017-ci ilin dekabrında Bakı Ağır Cinayətlər Məhkəməsinə Nail Allahverdiyevdən şikayətçi olmadıqları, bundan sonra da ona qarşı heç bir tələbləri olmayacağı barədə ərizə təqdim ediblər.
Ancaq S. Tekiş 2021-ci ildə 1 milyon 550 min dollar, 993 min Türkiyə lirəsi və 22 min avro pul tələbiylə onlara qarşı iddia qaldırıb. Bakı Apellyasiya Məhkəməsi bu iddianın nevrotronik sensorlu gəzmə cihazının dəyəri sayılan 22 min avroluq hissəsini təmin edib.
“O qərar da icra olunub. Hazırkı iddia isə tam əsassızdır. Üstəlik, bu tələbi irəli sürmək üçün qanunla müəyyən edilmiş müddət də ötürülüb”, - Allahverdiyevin nümayəndəsi məhkəmədə etirazını belə əsaslandırıb.
Bugünlərdə S. Tekişin iddiasına baxan Nərimanov Rayon Məhkəməsi onu təmin etməyib. Türkiyə vətəndaşı qərardan narazı qalıb və yuxarı instansiya məhkəməsinə şikayət vermək niyyətindədir.
Xatırladaq ki, sözügedən qəza 2017-ci il avqustun 3-də baş verib. 1994-cü il doğumlu Nail Allahverdiyev idarə etdiyi “Gelandewagen” markalı avtomobillə qarşısındakı maşını arxadan vurub, nəticədə idarəetməni itirib. Avtomobil beton yolayrıcını aşaraq, kənar yola çıxıb və piyadalar Vaqif Əsədov, Mutallib və Songül Tekiş cütlüyünü vurub. Ardından ətrafdakı binanın fasadına çırpılaraq yanıb.
Qəza nəticəsində piyada Əsədov və avtomobildə Allahverdiyevin yanında olmuş Mehdi Əliyev ölüb. Allahverdiyevin özünün də qolu sınıb.
Hadisədən sonra həbs olunan Allahverdiyev Bakı Ağır Cinayətlər Məhkəməsinin hökmüylə CM-in 263.3-cü (yol hərəkəti qaydalarını pozma, iki və daha çox şəxsin ölümünə səbəb olduqda) maddəsilə təqsirli bilinib və 6 il həbs cəzası alıb. Bakı Apellyasiya Məhkəməsi cəzanı 5 ilə endirdəndən sonra o, məntəqə tipli cəzaçəkmə müəssisəsinə köçürülüb.
Daha sonra Ali Məhkəmə N. Allahverdiyevə münasibətdə CM-in 70-ci (şərti məhkumetmə) maddəsini tətbiq edib və o, şərti cəza ilə azadlığa buraxılıb.
N. Allahverdiyevin babası Əli Həsənov 1998-2018-cu illərdə Qaçqın və Məcburi Köçkünlərlə İş üzrə Dövlət Komitəsinə rəhbərlik edib. O, eyni zamanda 21 il Baş nazirin müavini olub və 2019-cu ildə 71 yaşında bu vəzifədən azad edilib.
