Kişilər dizlərini örtməyən şort geyindiklərinə görə qandallanır və saxlanılır.

İranın əxlaq polisi yeni, sərt icra siyasəti çərçivəsində kişiləri şortik geyindikləri üçün həbs etməyə başlayıb. 

Lent.az xarici mediaya istinadən xəbər verir ki, son videolarda polisin kişiləri “geyim qaydasını” pozduqlarına görə qandallı aparması göstərilir. Polisin məhbusları söydüyü və döydüyü qeydə alınıb. Rəsmi qurumlar Tehranda temperaturun 45 dərəcəyə çatması ilə maraqlanmır və insanlar üçün "geyim qaydalarına" riayət etmək çətindir.

İran parlamenti hazırda kişilərin geyim tərzi ilə bağlı yeni qanunu müzakirə edir. Səlahiyyətlilər təvazökarlıq qanunlarının ciddi şəkildə tətbiq olunduğunu elan edirlər. Yeni qanun kişilər üçün “uyğun olmayan geyim”i, o cümlədən sinədən aşağı və topuqdan yuxarı bədən hissələrini örtməyən geyimləri müəyyən edir. 

Qanuna görə, “ictimai yerlərdə yarıçılpaq, çılpaq və ya uyğun olmayan geyimdə” aşkar edilən hər kəs həbs ediləcək.

Qanunu pozanlar altı aydan iki ilədək müddətə səyahət qadağası və sosial şəbəkələrdən istifadə məhdudiyyəti ilə üzləşirlər. Lakin səbirsiz məmurlar hələ rəsmi təsdiqini tapmamış bu qaydaları artıq tətbiq etməyə başlayıblar.

Məsələn, Tehrandan olan 35 yaşlı proqram mühəndisi Maysam “The Telegraph” qəzetinə deyib ki, isti gündə şortik geyindiyi üçün əxlaq polisi tərəfindən döyülüb. Gəzərkən yanında ağ rəngli bir maşın dayanıb, oradan üç nəfər sıçrayaraq ondan soruşublar və qışqırıblar: "Sən özünə nə icazə verirsən?"

"Boynumdan tutub zorla maşının arxa oturacağına oturtdular. Məni həbsxanaya apardıqlarını dedilər", - Maysam deyib. 

O, avtomobildə digər insanları, o cümlədən bir kişi və üç ağlayan qadını görüb, onlar da təvazökarlıq qanunlarını pozduqlarına görə saxlanılıblar. “Yalnız şort geyindiyimiz üçün bizə qarşı bu qədər sərt davranacaqlarını heç ağlımıza belə gətirməzdik”.

O, polis bölməsinə aparılıb, bir daha qanunu pozmayacağına söz verib və əlavə tədbir görülmədən sərbəst buraxılıb. Lakin qadınlara qarşı cinayət işi açılacağı bildirilib və onların işləri yerli məhkəməyə verilib.