Özbəkistanın səfiri Rusiya Xarici İşlər Nazirliyinə çağırılıb.

APA xəbər verir ki, bu barədə Rusiya XİN məlumat yayıb.

Qeyd edilib ki, buna səbəb Özbəkistan Milli Media Assosiasiyasının sədri Şerzodxan Kudratxojanın bəyanatları olub.

“Moskva əmindir ki, daxildən və ya xaricdən Rusiya Federasiyası və Özbəkistan xalqları arasında çəkişmə cəhdləri uğursuzluğa məhkumdur. Rusiya Federasiyası gözləyir ki, Özbəkistan Xarici İşlər Nazirliyi Kudratxojanın bəyanatlarına prinsipial qiymət verən rəsmi şərh təqdim edəcək”, - məlumatda deyilir.

Qeyd edək ki, Şerzodxan Kudratxoja 1966-cı il zəlzələsindən sonra Daşkəndə gələn rusların hələ də özbək dilini öyrənməmələrini tənqid edərək deyib ki, onlar seçim etməlidirlər, axmaqdırlar yoxsa, istilaçı.