Yeni mövsümün hazırlığını davam etdirən “Qəbələ” heyətinə daha bir futbolçu cəlb edib.

“Demokratikmusavat.com ” klubun mətbuat xidmətinə istinadən xəbər verir ki, “qırmızı-qaralar” qapıçı Rəşad Əzizlinin keçidini rəsmiləşdirib. 29 yaşlı qolkiperlə 1 illik müqavilə imzalanıb.

Əzizlinin son klubu “Şamaxı” olub. O, bunadək “Rəvan”, AZAL, “Səbail”, “Neftçi”, “Sumqayıt” və “Zirə”nin formasını geyinib. Qapıçı Azərbaycan milli komandalarında da çıxış edib.