Bakıda qohumunu bıçaqlayaraq qətlə yetirməkdə təqsirli bilinən Elşən Sadıqovun cinayət işi üzrə təfərrüatlar məlum olub.

"Ölkə.Az" xəbər verir ki, hadisə Xəzər rayonunda baş verib. Türkan qəsəbəsində Ağdaş rayon sakini 1987-ci il təvəllüdlü Elşən Sadıqov mübahisə zəminində qohumu 1991-ci il təvəllüdlü Qeyrət Ağabalayevi bıçaqlayaraq qətlə yetirib. 

Hadisəni törətdikdən sonra Elşən Sadıqov polisə gələrək könüllü təslim olub.

İş üzrə dəndirilmiş Elşən Sadıqov ifadəsində göstərib ki, ailə həyatı qurduqdan sonra 2012-ci ildə Bakıya köçərək Türkan qəsəbəsində yaşayıb. Fəhləlik etməklə ailəsin dolandırıb.

Qonşuluqda yerləşən bağda arvadının bibisi, əri və uşaqları Qeyrət Elnur və Elmar yaşayıb. 
Hadisə baş verən günü işdən evə qayıdarkən özünə məxsus velosipedin həyətdə olmadığını görüb. Bir qədər sonra 12 yaşlı qaynı Alı ağlaya-ağlaya gələrək velosipedi sürən vaxt Qeyrətin ondan alaraq geri qaytarmadığını qohumu Eldənizə verdiyini deyib. 

Əsəbləşən Elşən Alı ilə birlikdə qonşuluqda yerləşən evə keçib. Qeyrətin evdə olub olmaması ilə maraqlandıqda həyat yoldaşı onun kafeyə getdiyini deyib. Elşən Qeyrətə zəng edərək velosipedin harada olması ilə maraqlandıqda o, beş dəqiqədən sonra evə gələcəyini deyib. O, gəldikdən sonra Elşən nə səbəbə icazəsiz velosipedi uşaqdan aldığını və başqa şəxsə verdiyini soruşub. Qeyrət onunla kobud daşınsa belə Elşən velosipedi ondan alaraq Alıya verib və onu götürüb evə getməsini bidirib. 

Elşən Sadıqov Qeyrətə fikir verməyərək daha sonra söhbət edəcəklərini söyləyib evə gedərkən arxasınca gələn qohumu onu yumruqla vurub. Həmin vaxt yanlarında olan qohumları onları ayırsalar da Qeyrət onun və ailəsinin ünvanına söyüşlər söyüb. Buna  baxmayaraq Elşən oradan uzaqlaşaraq evə qayıdıb. İçəri daxil olarkən üstünün tozlu olduğunu görən ailə üzvləri nə baş verdiyini soruşduqda o, ayağının daşa dəyərək yerə yıxıldığını deyib. 

Elşən Sadıqov ifadəsinin davamında bildirib ki, yatmaq istəyərkən mobil telefonuna zəng edən Qeyrət onu az əvvəl onları ayırdıqları yerə çağırıb.

Əsəblərini cilovlaya bilməyən Sadıqov mətbəxdən bıçağı götürüb onunla rastlaşdığı yerə yollanıb. Həmin yerə çatanda qayınatası, Qeyrətin qardaşı Elnur və əmisi oğlu Elmirdə orada olublar. Elşən Qeyrətə içkinin təsiri keçəndən sonra söhbət etmələrini deyəndə sonuncu onunla kobud danışaraq hədələməyə başlayıb. Buna dözməyən Elşən cibindən çıxardığı bıçaqla Qeyrətin sinə nahiyyəsinə zərbələr endirib. Qohumlarının köməkliyi ilə xəstəxanaya aparılan yaralı yolda dünyasını dəyişib.

Elşən Sadıqov isə oradan bir başa qayınatasının evinə gedərək bıçağı çarpayının altında gizlədib. Bir qədər sonra isə evdən çıxaraq polisə gedib və törətdiyi cinayət barədə məlumat verib.

Məhkəmə prosesi zamanı Elşən Sadıqov ittiham üzrə özünü təqsirli bilib.

Sonda məhkəmənin hökmü ilə Elşən Sadıqov 14 il müddətinə azadlıqdan məhrum olunub.

Natiq