Mərkəzi Seçki Komissiyasının saytında yayılan məlumata görə, Azərbaycanda qeydiyyata alınan 57 siyasi partiyadan 22-si 2022-ci ilin maliyyə hesabatını bu günə qədər quruma təqdim etməyib. 

Maliyyə hesabatını təqdim etməyən partiyalardan biri də Azərbaycan Liberal Partiyasıdır (ALP). 

"Demokratikmusavat.com"-a açıqlamasında partiya sədri Əvəz Temirxan keçən il üçün maliyyə hesabatı vermədiklərini təsdiqlədi və bunun səbəbini də maliyyə fəaliyyətlərinin olmaması ilə əlaqələndirdi:

“2022-ci ildə maliyyə fəaliyyətimiz olmayıb, ona görə də hesabat verməmişik. Qanuna görə maliyyə fəaliyyəti olmayanda hesabat verilməyə bilər”. 

HƏP Məclisinin sədri Zəlimxan Məmmədli bu barədə informasiyaya malik olmadığını dedi:

“İnformasiyam yoxdur. Öyrənib açıqlama verəcəyik”.  

Qeyd edək ki, siyasi partiyalar 2022-ci il üçün maliyyə hesabatlarını aprelin 1-nə kimi Mərkəzi Seçki Komissiyasına təqdim etməli idilər. 

Onu da əlavə edək ki, Azərbaycan Dirçəliş və Tərəqqi, Milli Dövlətçilik, Vahid Kommunist, Sosial Ədalət, Vətənpərvərlər, Azad Respublikaçılar, Azadlıq partiyaları artıq 4-cü ildir ki, maliyyə hesabatı vermirlər.

Əvvəlki üç ildə maliyyə hesabatı verməyən Azərbaycan Xalq Cəbhəsi Partiyası isə 2022-ci il üçün hesabatı artıq MSK-ya təqdim edib.