Azərbaycanda hava şəraiti yenidən kəskin dəyişib. Temperatur aşağı düşüb, bölgələrdə qar yağıb. Ekologiya və Təbii Sərvətlər Nazirliyinin Milli Hidrometeorologiya Xidmətinin martın 12-si səhər saat 10:00-a olan məlumatına əsasən ölkə ərazisində hava şəraiti yağıntılı olub, qar yağıb, bəzi yerlərdə intensiv olub.

Qar örtüyünün hündürlüyü Sarıbaşda (Qax) 42, Ağdərədə 29, Şahdağda 28, Kişçayda (Şəki) 20, Daşkəsəndə 19, Göygöldə 15, Qusarda 14, Qubada 12, Qrızda 11, Xaltanda 10, Gədəbəydə 8, Altıağacda 7, Mingəçevirdə 6, Tovuz, Göyçayda 5, Oğuz, Şəki, Qobustan, Xaçmaz, Tərtərdə 4, Gəncə, İmişli, Yardımlı, Lerik, Şabranda 3, Qəbələ, Zaqatala, Bərdə, Zərdabda 2, Naftalanda 1 sm olub. Havanın kəskin soyuması, güclü qar yağması Azərbaycanda mart ayı üçün xarakterik deyil.

Milli Ekoloji Proqnozlaşdırma Mərkəzinin rəhbəri Telman Zeynalov Cebhe.info-ya açıqlamasında deyib ki, iqlim dəyişikliyi qlobal soyuqlaşma ilə bağlıdır: “Bu, onunla bağlıdır ki, Yer kürəsində çatlaq var. O çatlaqdan atmosferə metan və digər qazlar çıxır, ozon təbəqəsini dağıdır. Ozonda dəliklər yaranır. Troposferdən yuxarıda olan soyuq hava kütləsi keçib bura gəlir”.

Bu yaxınlarda Qazaxıstanda havanın kəskin soyuqlaşması bir sıra heyvanların məhvinə səbəb olmuşdu. Ekoloq hesab edir ki, Qazaxıstanda baş vermiş buzlaşma da həmin prosesin təsiridir: “Bəziləri təbiətdə karbon qazının artmasından narahatdır. Lakin bu, düzgün deyil. Karbon qazı insan həyatı üçün oksigen qədər önəmlidir və onun çatışmazlığı immun sistemini zəiflədir. Belə olan halda, insan orqanizmi tez qocalır. Karbon qazı olmasa yer kürəsində yaşayış olmaz. İqlim dəyişikliyi karbon qazından asılı deyil”.

Martda güclü qar yağırsa, yay fəsli necə keçəcək? Yay ayları sərin olacaq? Ekoloq hesab edir ki, əksinə yayda temperatu yüklsələ bilər: “Yay ola bilər ki, həddindən artıq isti keçsin”.