Yaşayış binasındakı qonşular səhər saatlarında balaca qızın ürəkağrıdan fəryadını eşidiblər.

Çində şok hadisədə qadın iki azyaşlı uşağını 23-cü mərtəbənin hündürlüyündə açıq hava kondisionerinin üzərinə qoyaraq ölüm təhlükəsi ilə üz-üzə saxlayıb.

Demokratikmusavat.com bildirir ki, ana ailədəki mübahisə zamanı ərini qəzəbləndirmək üçün bu riskli addımı atıb.

Henan əyalətində yerləşən Loyane şəhərində yaşayış binasının sakinləri səhər saatlarında qızın ürəkağrıdan fəryadını eşidiblər. Onlar bayıra baxanda hər iki uşağı son dərəcə təhlükəli vəziyyətdə, binanın kənarında kondisionerdə oturmuş vəziyyətdə görüblər. Qız həddindən artıq stress vəziyyətində olub, hönkür-hönkür ağlayaraq kömək üçün yalvarıb, kiçik qardaşı isə təəccüblü şəkildə sakitliyini qoruyub saxlayıb.

Bu zaman ana pəncərənin üstündə oturub və uşaqların atası ilə şiddətlə mübahisə edib, onun uşaqlara yaxınlaşmasına imkan verməyib. Hadisənin şahidləri ər-arvad arasında münaqişənin nədən qaynaqlandığını müəyyən edə bilməyiblər, lakin vəziyyətin uşaqların həyatı üçün getdikcə daha çox təhlükə yaratdığı açıq-aydın görünüb. Hadisə yerindən çəkilən görüntülərdə uşaqların heç bir sığorta və ya təhlükəsizlik ləvazimatının olmadığı görünüb ki, bu da vəziyyəti daha da dəhşətli edib.

Hadisə şahidlərindən biri dərhal polisə müraciət edib. Tezliklə hadisə yerinə gələn yanğınsöndürənlər qısa müddətdə uşaqların xilas edilməsi üçün əməliyyata başlayıblar. Yerli Qadın və Uşaq Federasiyasının sözçüsü təsdiqləyib ki, yanğınsöndürənlər körpələri təhlükəsiz şəkildə kondisionerin üstündən təhlükəsiz yerə köçürə biliblər.