Tovuzda kirayə qaldığı evin sahibi, 1952-ci il təvəllüdlü İntizar Bağırovanı qətlə yetirən şəxslərin məhkəmə prosesi başa çatıb.

Demokratikmusavat.com xəbər verir ki, “Qafqazinfo”nun məlumatına görə, Gəncə Ağır Cinayətlər Məhkəməsində 1990-cı il təvəllüdlü Aynaz Alıyeva və həmyaşıd olan sevgilisi Elçin Əliyevə hökm oxunub.

Hökmə əsasən, A.Alıyeva 12 il, qeyri-rəsmi münasibətdə yaşadığı E.Əliyev isə 2 il 5 ay müddətinə azadlıqdan məhrum edilib.

Ötən ilin mayında baş vermiş cinayət hadisəsinin təfərrüatına gəlincə, Aynazla Elçin 71 yaşlı qadının evində kirayə qalan zaman onun cəmi dəyəri 400 manat olan qızıl üzüklərini və 500 manat məbləğində diş protezini oğurlayıblar.

Qadın bundan xəbər tutan zaman tərəflər arasında mübahisə yaşanıb. Mübahisə zamanı isə Aynaz Alıyeva yaşlı qadını pilləkəndən itələyib, daha sonra ona dəmir parça ilə zərbələr endirib. Bu isə İntizar Bağırovanın ölümünə səbəb olub. 

Qeyd edək ki, cinayətdə iştirak edən cütlük qadının diş protezini cəmi 75 manata satmağa müvəffəq olublar ki, bunun da 50 manatını İntizar Bağırovaya kirayə haqqı kimi ödəyiblər.