Çində yeni pandemiya dalğası və möhkəmlənən dollar fonunda qiymətlər dəyişməyə başladı (əlverişsiz məzənnəyə görə, ABŞ-dan kənar alıcılar üçün neft və digər əmtəələri almaq çətinləşir).

Demokratikmusavat.com Bizimyol.info xəbər verir ki, neftin qiyməti ilin əvvəlindən aşağı düşüb: əgər ötən ilin böyük hissəsində bu qiymətlər bir barel üçün 90 dollardan çox idisə (Ukraynadakı münaqişə ilə əlaqədar), dekabr ayından etibarən ucuzlaşmağa başlayıb. Son 4 gündə isə Brent nefti 80 dollardan aşağı qiymətə satılır.

NBC -nin qeyd etdiyi kimi, Çində zəif tələb, güclü dollar və iqtisadiyyatdakı qeyri-müəyyənlik qiymətləri aşağı salır.

Çin hökuməti neft məhsullarının ixracı üçün kvotaları artırıb. Mütəxəssislərin fikrincə, bu qərarın səbəbi iqtisadiyyatda tələbatın zəif olması və yeni koronavirus dalğası səbəbindən onun azalmasıdır. Çində dekabr ayında sənaye fəaliyyətinin azalması da tələbin azalmasına işarə edir.

Öz növbəsində BVF-nin icraçı direktoru Kristalina Georgiyeva bildirib ki, ABŞ, Avropa və Çin eyni vaxtda iqtisadiyyatın yavaşlamasını gözləyir. Nəticədə, fondun gözləntilərinə görə, 2023-cü il qlobal iqtisadiyyat üçün 2022-ci ildən daha çətin olacaq.

Bundan əlavə, dolların möhkəmlənməsi tendensiyası davam edir. Federal Ehtiyatlar Sistemi faiz dərəcələrini artırarkən və inflyasiyanı cilovlasa da, ABŞ fond bazarlarında faiz dərəcələri yüksəlir ki, bu da dollar qiymətli kağızlarının cəlbediciliyini artırır (bu səbəbdən də dollara tələb və dolayısıyla onun məzənnəsi artır). Dolların bahalaşması ilə əlaqədar olaraq ABŞ-dan kənarda əmtəələrin qiyməti qalxır (çünki neft, metal və digər mallar dollarla kotirovka edilir). Ona görə də dollar bahalaşdıqca, bu malların digər valyutalara nisbətdə qiymətləri bir o qədər baha olur.

Commerzbank-ın gözləntilərinə görə, 2023-cü ilin ikinci rübündən qlobal iqtisadiyyatda canlanma və nəticədə neftin qiymətinin bir barel üçün 100 dollara yüksəlməsini gözləmək olar.