Ağstafa rayonu İcra Hakimiyyəti başçısının Ağstafa şəhər inzibati ərazi dairəsi üzrə nümayəndəliyi bu gün şəhərdə abadlıq işlərinin satınalınması müsabiqəsinə yekun vurub.
AzToday.az xəbər verir ki, 325 min 727 manat 39 qəpik məbləğində olan tenderin qalibi “Meqa An İnşaat” MMC olub. Tenderin şərtlərinə görə, şirkət abadlıq müxtəlif həcmdə abadlıq işləri görəcək.
Qeyd edək ki, “Meqa An İnşaat” MMC 1 dekabr 2009-cu il tarixdə qeydiyyata alınıb və 07.08.2020 tarixində reyestr məlumatlarına dəyişiklik edilib. Nizamnamə kapitalı 10 AZN olan şirkətin hüquqi ünvanı Ağstafa şəhəri, M.Ə.Sabir küçəsi, ev 9-da yerləşir. MMC-nin qanuni təmsilçisi isə Aslanov Yaşar İmamverdi oğludur.
Məlum olub ki, Ağstafa Rayon İcra Hakimiyyətinin keçirdiyi tenderlərin qalibi olmaqda “Meqa An İnşaat” MMC liderdir. Dövlət Təhlükəsizliyi Xidməti tərəfindən həbs olunmuş Nizaməddin Quliyevin Ağstafada icra başçısı olduğu zamandan başlayaraq sözgedən MMC rayonda əksər satınalmaların qalibi olmaqdadır. Məsələn, İcra Hakimiyyəti 1 mart 2018-ci il tarixdən 14 noyabr 2020-ci il tarixə qədər 19 tender keçirib.
Tenderlərin 4-nün qalibi “Meqa An İnşaat” MMC olub. Satınalma müqavilələrində Ağstafada qeyri yaşayış binalarının təmiri (bağça), abadlaşdırma xidmətləri haqqının ödənilməsi və rayonda yolların əsaslı təmiri işləri nəzərdə tutulur. Ümumilikdə, şirkətə bunun üçün 487 410 AZN ödənilib.
Maraqlı məqamlardan biri də “Meqa An İnşaat”a məxsus VÖEN-in vaxtilə “Səma MM İnşaat”a məxsus olmasıdır. Bu şirkətin qanuni təmsilçisi də Yaşar Aslanov olub. Şirkət 2020-ci ildən adını “Meqa An İnşaat”-a dəyişib. Ən azından VÖEN nömrələrinin eyniliyi bunu deməyə əsas verir.
Ağstafa Rayon İcra Hakimiyyətinin tenderlərində “Səma MM İnşaat” MMC-nin əhəmiyyətli payı var. Şirkət İcra Hakimiyyətindən 2 227 692 AZN məbləğində dövlət sifarişi alıb.
Görünür, “Səma MM İnşaat” MMC ilə tender maxinasiyalarını davam etdirmək mümkün olmayıb. Ona görə də dövriyyəyə “Meqa An İnşaat” MMC girib.
Yeri gəlmişkən xatırladaq ki, satınalmalar üzrə dövlət qurumunun saytında yer alan məlumatlara görə, MMC 19.11.2019 tarixindən indiyə kimi 16 tenderin qalibi olub. Bu tenderlərin 6-sını “Səma MM İnşaat” adı ilə udub. digər bir maraqlı məqam isə odur ki, şirkətin qalib gəldiyi tenderlərin yalnız ikisini Qazax Suvarma Sistemləri İdarəsi, 14-unu isə Ağstafa rayonunda fəaliyyət göstərən dövlət qurumları keçirib.
Bu arada onu da qeyd edək ki, bu gün 325 minlik tenderin qalibi olan “Meqa An İnşaat” MMC-nin məcburi dövlət öhdəliklərinin yerinə yetirilməsində də axsayır. Məsələn, şirkətin bu günə olan vergi borcu 60 manat təşkil edir. Məbləğindən asılı olmayaraq vergi borcu olan şirkətlərin satınalmalarda iştirakı mövcud qanunvericiliklə məhdudlaşdırılır.
Göründüyü kimi, Ağstafanın yeni və gənc icra başçısı Seymur Orucov da sələfi Nizaməddin Quliyevin ənənəsini davam etdirməkdədir.
Mənbə AzToday.az
