Bolqarıstan Prezidentinin administrasiyasının internet saytı şənbə günü səhər kütləvi DDoS hücumuna məruz qalıb və bu, işin dayandırılmasına və ya səhifəyə girişin müvəqqəti məhdudlaşdırılmasına səbəb olub.

Demokratikmusavat.com xəbər verir ki, bu barədə Bolqarıstan İnformasiya Agentliyi məlumat yayıb.

Prezidentin mətbuat xidməti hücumun saytın məzmununa təsir etmədiyini vurğulayıb. Hücumun nəticələrini minimuma endirmək üçün də tədbirlər görülüb.

Bundan əlavə, Bolqarıstanın bir sıra dövlət qurumlarının internet saytları da sındırılıb.

Sofiya Şəhər Prokurorluğu mediada haker hücumu ilə bağlı məlumatların yoxlanılması barədə göstəriş verib.

Bolqarıstan Baş prokurorunun müavini, Milli İstintaq Xidmətinin direktoru olan Borislav Sarafov kiberhücumun Rusiyanın Maqnitoqorsk şəhərindən həyata keçirildiyini bildirib.

Daha sonra kiberhücuma görə məsuliyyəti Rusiyanın Killnet haker qrupu öz üzərinə götürüb.(publika.az)