Biz Ermənistanla Azərbaycanın Avropa İttifaqının (Aİ) müşahidəçiləri ilə əməkdaşlıq edib vəziyyətin sabitləşməsinə töhfə verəcəklərini və bununla da sülh danışıqları üçün əlverişli mühitin yaradılmasına, eyni zamanda, sərhəd komissiyalarının məqsədyönlü işinə imkan yaradacaqlarını gözləyirik.

"Demokratikmusavat.com" xəbər verir ki, bunu Aİ-nin Cənubi Qafqaz və Gürcüstan böhranı üzrə xüsusi nümayəndəsi Toivo Klaar "news.am"a müsahibəsində deyib.

O bildirib ki, Aİ-nin mülki missiyasının regionda təhlükəsizlik və son vəziyyətlə bağlı hesabat vermək mandatı var: “Gözləntimiz budur ki, Aİ müşahidəçilərinin mövcudluğu hər hansı mümkün gərginliyin qarşısını almağa kömək edəcək”.

Klaar qeyd edib ki, Ermənistan-Azərbaycan dövlət sərhədinin Azərbaycan hissəsində fiziki iştirak olmadan belə, Azərbaycan tərəfi Aİ-nin Monitorinq Missiyası ilə müvafiq kanallar vasitəsilə əməkdaşlıq edəcəyini bildirib.

Xüsusi nümayəndə vurğulayıb ki, Ermənistan XİN başçısı 22 sentyabrda Aİ-nin Ali Nümayəndəsinə ünvanladığı məktubda missiyanın Ermənistan ərazisində yerləşdirilməsini xahiş edib.

Praqa görüşünə toxunan Klaarın sözlərinə görə, burada əldə olunan vacib nəticələrdən digəri isə hər iki ölkənin bir-birinin ərazi bütövlüyünü beynəlxalq sənədlər əsasında tanımasıdır.

Klarr diqqətə çatdırıb ki, sərhəd demarkasiya edilməsə də, mövcuddur: “Həmçinin ikitərəfli sərhədin Azərbaycan tərəfində olan erməni qüvvələri də geri çəkilməlidir. Gərginliyin bu yolla azaldılması, şübhəsiz ki, delimitasiya komissiyalarının işinə müsbət töhfə verəcək. Fikrimcə, hər iki məqam vacibdir: mövcud sərhədə hörmət və delimitasiya danışıqlarında tam iştirak. Ümid edirik ki, sərhəd komissiyalarının Brüsseldə keçiriləcək növbəti iclası müəyyən konkret nəticələr əldə etməyə kömək edəcək”.

Aİ rəsmisi Qarabağdakı erməni əhalisinin gələcəyi barədə sualı da cavablandırıb. Xüsusi nümayəndə Azərbaycanda və Ermənistandakı tərəfdaşlarla bu mövzuda mütəmadi olaraq fikir mübadiləsinin aparıldığını əlavə edib.

Toivo Klaar diqqətə çatdırıb ki, Aİ Qarabağın erməni əhalisinin hüquqlarına və təhlükəsizliyinə təminatların gələcək sülhün olduğu Cənubi Qafqazın əsas elementi olacağını həmişə açıq şəkildə bəyan edib: “Mən hər şeydən əvvəl hesab edirəm ki, Bakının hərtərəfli strategiya işləyib hazırlaması və Qarabağdakı erməni əhalisi ilə konstruktiv və şəffaf dialoq prosesində iştirak etməsi vacibdir. Qarabağ ermənilərinin hüquqlarını və təhlükəsizliyini təmin edəcək həll variantı buradakı əhalinin, Ermənistanın, Azərbaycanın, beynəlxalq ictimaiyyətin də marağındadır”.

Aİ rəsmisi Azərbaycan və Ermənistanın bu ilin sonunadək sülh müqaviləsi imzalaması ilə bağlı fikirlərə də münasibət bildirib. Toivo Klaar deyib ki, bu məqsədə çatmaq tərəflərdən asılı olacaq: “Aydın olan odur ki, Aİ bu prosesi dəstəkləyir və əminik ki, razılaşma hərtərəfli həll üçün həlledici element olacaq”.

Sosial şəbəkələrdə yayılan görüntülərlə bağlı sualı cavablandıran xüsusi nümayəndə vurğulayıb ki, keçmiş cinayətlər heç bir halda zorakılığın təkrarlanmasına haqq qazandıra bilməz: “Buna birdəfəlik son qoyulmalı və bu cinayətləri törədənlər ədalət qarşısında cavab verməlidirlər. Həmçinin, kimin törətməsindən asılı olmayaraq, əvvəllər törədilmiş cinayətlərin etirafı və araşdırılması lazımdır. Azərbaycan tərəfi zorakılıqla bağlı son xəbərləri araşdırmaq üçün ilkin addımlar atıb və biz bu prosesləri yaxından izləyəcəyik. Eyni zamanda, hər iki tərəfə keçmiş və son zorakılıqlara ədalətli münasibətin təmin edilməsi, bu cür təsvirolunmaz hərəkətlərin təkrarlanmaması üçün əllərindən gələni etməyə dair çağırışımızı təkrar etmək istərdim. Düşmənçilik və nifrət səhifəsi gələcək nəsillər üçün birdəfəlik qapanmalıdır”.